काठमाडौं । महानगरीय प्रहरी अपराध महाशाखाले नेपाल आयल निगम थानकोट डिपोका प्रमुख रबिन शर्मालाई आज साँझ पक्राउ गरेको छ । पेट्रोल पम्पहरुसँग मिलेर उपभोक्तालाई ठगी गरेको भन्दै उनलाई नियन्त्रणमा लिइएको एसएसपी सर्वेन्द्र खनालले जानकारी दिए । उनले उपत्यकाका १३ वटा पम्पहरुसँग मिलेर सघाएको खनालले बताए । महाशाखाले केही समयअघि राजधानीमा पम्पहरुमा छापा मारेर ठगी गर्ने पम्प संचालकहरुमाथि मुद्दा दायर गरेको छ । पेट्रोल पम्प संचालकहरुले शर्माले पम्ममा रिमोर्ट जडान गर्न सघाएको बताएपछि उनलाई नियन्त्रणमा लिइएको खनालले बताए । उनीमाथि ठगी र कालोबजारीको मुद्दा चलाउने प्रहरीले जनाएको छ ।