अन्य
नाकाबन्दीले लिँदै छ नेपालीको ज्यान
आइतबार, कात्तिक २९, २०७२
काठमाडौं । सिरहाका नेविसंघ जिल्ला कमिटी सदस्य कमलेशकुमार यादवले मोटरसाइकलका लागि केही पेट्रोल जोहो गरेर घरमा राखेका थिए । तर, त्यही पेट्रोल उनको मात्र होइन, श्रीमतीको पनि काल बन्न पुग्यो । पेट्रोलका कारण घरमा लागेको आगोले गम्भीर घाइते भएका दुवैजनाको शनिबार उपचारको क्रममा काठमाडौंको शिक्षण अस्पतालमा मृत्यु भएको हो ।
सिरहाको महादेवा पोर्तहा–७ गाविसमा अवस्थित यादवको घरमा गत १७ कात्तिकमा आगो लागेको थियो । पेट्रोल पोखिएको कोठामा आगो बाल्न खोज्दा त्यसरी यादवदम्पतीको मृत्यु भएको हो । घरको आगो निभाउने क्रममा गम्भीर घाइते भएका २७ वर्षीय कमलेश्वर र उनकी २४ वर्षीया श्रीमती पूजा यादव चौधरीको मृत्यु भएको हो । पूजाका भाइले पेट्रोल बल्छ कि बल्दैन भनेर सल्काउँदा पूरै घर नै जलेको थियो । भारतको अघोषित नाकाबन्दीले निम्त्याएको इन्धन समस्याका कारण उनले घरमा पेट्रोल राखेका थिए ।
इलाका प्रहरी कार्यालय लहानका डिएसपी उमाप्रसाद चतुर्वेदीका अनुसार पूजाका १० वर्षीय भाइले बल्छ कि बल्दैन भनेर पेट्रोल पोखिएको स्थानमा आगो बाल्दा उक्त दुर्घटना भएको हो । त्यसवेला पूजा घरभित्र सुतेकी थिइन् । उनलाई जोगाउँदा कमलेश घरभित्र पसेका थिए, आगो निभाउन खोज्दा दुवैजना गम्भीर घाइते भएका थिए ।
भारतको अघोषित नाकाबन्दीले नेपालमा मानवीय संकट सुरु भइसकेको छ भने अन्य दुर्घटना र विपत् पनि निम्त्याउन थालेको छ । नाकाबन्दकी कारण सिर्जित ती दुर्घटनाले धेरै नेपालीले ज्यान गुमाउन थालेको आजको नयाँ पत्रिका दैनिकमा समाचार छ ।
सिरहाकै प्रकृतिको घटना गत २४ असोजमा काठमाडौंको कोटेश्वरमा पनि भएको थियो । जोहोका लागि ग्यालिनमा राखिएको पेट्रोलकै कारण एकै परिवारका तीनजनाको मृत्यु भएको थियो । रामेछाप लखनपुरका लेखराज श्रेष्ठ, उनकी श्रीमती देउकी र छोरी जेनिशा श्रेष्ठको पेट्रोलबाट सल्किएको आगोले मृत्यु भएको थियो । लेखराज ट्याक्सीचालक हुन् । उनले आफ्नो डेरामा जोहो गरेर पेट्रोल राखेका थिए । एउटा भाडोबाट अर्को भाडामा पेट्रोल खन्याउने क्रममा आगो लागेको थियो । लोडसेडिङका कारण डेरामा मैनबत्ती बालेकाले पेट्रोल पोखिएर सल्किएको थियो ।
यसरी पेट्रोलमा आगो लागेर हुने मृत्युका साथै नाकाबन्दीको अप्रत्यक्ष प्रभाव सडक दुर्घटनामा पनि पर्न थालेको प्रहरी अधिकारीहरू बताउँछन् । इन्धनको अभावका कारण सवारीसाधनहरूले क्षमताभन्दा तेब्बरसम्म यात्रु बोकेका छन् । जसले दुर्घटनाको जोखिम बढाएको छ ।
गत ३ कात्तिकमा यात्रुसँगै इन्धन बोकेको बस बाँकेको खासकुस्मामा दुर्घटना हुँदा आठजनाले ज्यान गुमाएका थिए । बसमा पेट्रोल राखिएकाले दुर्घटनापछि आगो लागेर धेरै जलेका थिए । उक्त घटनापछि प्रहरीले यात्रुबाहक बसमा इन्धन ओसारपसार गर्न कडाइ गरेको थियो ।
गत वर्षको तुलनामा यो वर्षको दसैँ–तिहारमा कम दुर्घटना भए पनि कतिपयमा इन्धन अभावको अप्रत्यक्ष कारण रहेको प्रहरी प्रवक्ता डिआइजी कमलसिंह बम बताउँछन् ।
व्यावहारिकता हेरेर ट्राफिक प्रहरीले पनि धेरै यात्रु बोक्ने प्रवृत्तिलाई रोक्न पहल गरेको छैन । गत १७ कात्तिकमा रसुवामा भएको बस दुर्घटनाको अप्रत्यक्ष कारण इन्धन अभाव भएको प्रहरी अधिकारीहरू बताउँछन् । थोरै मात्र सवारीसाधन चल्दा एउटैमा धेरै यात्रु चढेको र अप्ठेरो बाटोमा चालकले बसलाई नियन्त्रण गर्न नसक्दा दुर्घटना भएको थियो । राम्चे गाविसमा भएको उक्त दुर्घटनामा ३८ जनाको मृत्यु भएको थियो । इन्धन अभावले समयमा एम्बुलेन्ससमेत बिरामी लिन जान सक्ने अवस्था छैन । इन्धन अभावकै कारण मुलुकका धेरै ठाउँमा एम्बुलेन्स जान नसक्दा उपचार अभावमा कतिपय मानिस ज्यान गुमाउन विवश छन् ।
कहाँ, कसले ज्यान गुमाएः
सिरहाको महादेवा पोर्तहाका कमलेशकुमार यादवको घरमा मोटरसाइकलमा हाल्ने क्रममा पेट्रोल पोखिएको थियो । कमलेशका आफन्तले पेट्रोल बाल्न खोज्दा उनको घर मात्र जलेन, यादवदम्पतीकै मृत्यु भयो । १६ कात्तिकमा यादवदम्पती जलेर घाइते भएकोमा काठमाडौंमा उपचारका क्रममा शनिबार उनीहरूको मृत्यु भयो ।
गत २४ असोजमा कोटेश्वरका ट्याक्सीचालक लेखराज श्रेष्ठदम्पती र छोरीले घरमा ‘स्टक’ राखेको पेट्रोलकै कारण ज्यान गुमाए । पेट्रोल खन्याउने क्रममा पोखिएर आगो लाग्दा तीनैजनाको मृत्यु भएको थियो ।
गत ३ कात्तिकमा बाँकेको खासकुस्मामा पेट्रोल र यात्रु बोकेको बस दुर्घटना हुँदा आठजनाको मृत्यु भयो । इन्धन अभावका कारण बसले पेट्रोल ओसार्ने क्रममा बस दुर्घटनामा परेको थियो । पेट्रोलमा लागेको आगोका कारण बस नै जलेको थियो ।
गत १७ कात्तिकमा रसुवाको नाम्चेमा क्षमताभन्दा धेरै यात्रु बोकेको बस दुर्घटनामा पर्यो, जसमा ३८ जनाले ज्यान गुमाए । इन्धन अभावमा जिल्लामा थोरै मात्र सवारीसाधन चलेकाले सो बसमा खचाखच यात्रु थिए ।
प्रकाशित मिति: आइतबार, कात्तिक २९, २०७२
प्रतिक्रिया दिनुहोस्
