सुर्खेतमा प्रर्दशन चर्कियो,दुईजनाको मृत्यु

सुर्खेत । अखण्ड मध्यपश्चिम र सुर्खेतलाई संघीय राजधानी बनाउन माग गर्दै सुरु भएको आन्दोलन हिंसात्मक हुँदा दुईजनाको ज्यान गएको छ । आइतबारदेखि सुरु आन्दोलन अनियन्त्रित हुँदै गएपछि स्थानीय प्रशासनले आज साढे एक बजे कप्mर्यू लगाएको थियो । कप्mर्यु उल्लंघन गर्दै आन्दोलनमा उत्रिएकामाथि प्रहरीले गोली चलाउँदा दुईजनाको मृत्यु भएको हो । मृतकमा वीरेन्द्रनगरका टीकाराम गौतम र यामबहादुर बिसी छन् । प्रमुख जिल्ला अधिकारी बलदेव गौतमले भिड नियन्त्रण गर्न हवाइ फायर गरिँदा घटना भएको बताए । ‘के कति क्षति भयो भन्नेबारे अहिले विस्तृत जानकारी आएको छैन,’ उनले भने । कप्mर्यु राति ९ बजेसम्मको लागि लगाइएको उनले बताए । आन्दोलनकारीले सुरुमा झुप्रा बृहत खानेपानी आयोजनाको कार्यालयमा तोडफोड गरेका थिए । त्यसपछि उनीहरु जिल्ला प्रशासन कार्यालयतिर गएका थिए । अनियन्त्रित आन्दोलनले जिल्ला विकास समितिको कार्यालय, नगरपालिका कार्यालय, सभासद एवं कांग्रेस सहमहामन्त्री पूर्णबहादुर खड्काको घरमा समेत आगजनी गरेका छन् । खड्काको घरमा रहेका गाडी र जिल्ला प्रहरीप्रमुखको गाडीसमेत आगजनी गरेका प्रहरीले जनाएको छ ।