पार्टी फुटाउने, मिलाउने र सुशीललाई प्रधानमन्त्री बनाउने मै हो: देउवा

काठमाडौं । नेपाली कांग्रेसका वरिष्ठ नेता शेरबहादुर देउवाले पार्टीमा एकता कायम गर्न आफू सक्रिय हुने बताएका छन् । प्रेस युनियनले वीपी स्मृति दिवसका अवसरमा आयोजना गरेको कार्यक्रममा बोल्दै देउवाले पार्टीभित्र विद्यमान ६०–४० को भागबण्डा अन्त्य गर्ने बताए । विगतमा विविध कारणले आफैले नेपाली कांग्रेस फुटाएको र गिरिजाबाबुसंग सहकार्य गरेर आफैले पार्टी एक गराएको भन्दै देवाले फेरिपनि पार्टीलाई एकताबद्ध बनाउन आफू अग्रसर हुने बताए ।‘हिजो विविध कारणले मैले पार्टी फुटाए । गिरिजाबाबु आज हुनुहुन्न उहासंग मिलेर पार्टी एक बनाएको पनि मैले नै हो । अहिले भएको भागबण्डाको राजनीति पनि मै हटाउँछु ।’, देउवाले भने । घुमाउरो पारामा १३ औं महाधिवेशनमा आफू सभापतिमा लड्ने जनाउ दिदैं देउवाले आफ्ना कारणले मात्रै सुशील कोइराला प्रधानमन्त्री बनेको दावीसमेत गरे । ‘पार्टी एक भएकैले ठूलो भयो र ठूलो पार्टीको नेता भएकाले सुशीलजी प्रधानमन्त्री बन्नुभयो । म नभएको भए उहाँ प्रधानमन्त्री बन्नुहुन्थ्यो ?’, देउवाले प्रश्न गरे । नयाँ संविधानका धेरै विषयमा सम्झौता गर्न तयार रहेपनि लोकतन्त्रका आधारभूत मान्यताहरुमा सम्झौता नगर्ने उनले बताए ।