भारत भ्रमण सफल भयो, म उत्साहित छु : प्रचण्ड

काठमाडौं । भारतको पाँच दिने भ्रमण सकाएर सोमबार स्वदेश फर्किएका एमाओवादी अध्यक्ष पुष्पकमल दाहालले आफ्नो भ्रमण सफल भएको बताएका छन् । उनले शान्ति, संविधान, सीमा विवादलगायत विषयमा आफूले स्पष्ट रुपमा भारतीय प्रधानमन्त्रीलगायत नेताहरुसँग कुरा राखेको बताए । ‘मैले यो भ्रमणमा केही महत्वपूर्ण कुराहरु बारे छलफल गर्ने र भारतीय पक्षलाई जानकारी गराउने मौका पाएँ,’ भारत भ्रमणबाट फर्किएलगत्तै त्रिभुवन अन्तर्राष्ट्रिय विमानस्थलमा आयोजित पत्रकार सम्मेलनमा सञ्चारकर्मीहरुसँग भ्रमणबारे जानकारी गराउँदै दाहालले भने, ‘निश्चिय नै मेरो यो भ्रमण सफल भएको छ, यसबाट म निकै उत्साहित भएको छु ।’ दाहालले आफ्नो भ्रमणका क्रममा सरकारी पदाधिकारी, विभिन्न दलका नेताहरुसँग कुराकानी गरेको जानकारी दिँदै कालापानीदेखि सुस्ता र लिपुलेकका विषयमा पनि भारतीय पक्षसँग छलफल गरेको बताए । ‘लिपुलेकबारे भारतका विदेश मन्त्री र विदेशसचिवसँग कुरा गर्दा दुवैले छलफल गरेर टुंग्याउने बचन दिएका छन्,’ दाहालले भने, ‘मोदीले नेपाल आउँदा दुई देशको सीमा समस्या सुल्झाउने कुरा राख्नु भएको थियो । उहाँलाई मैले योपटक उहाँको प्रतिवद्दता सम्झाउने काम पनि गरेको छु ।’ दाहालले द्वीपक्षीय हितका अलावा शान्ति र संविधानको विषयमा गम्भीर छलफल गर्दै विवेकले भ्याएसम्म जनताको कुरा राखेको जानकारी दिए । उनले जनयुद्दकालमा तत्कालीन राजाको आग्रहमा प्रतिबन्धित गरिएको अखिल भारत नेपाली संघको प्रतिबन्ध फकुवा गर्न भारतीय सरकारसँग् कुरा राखेको जानकारी पनि उक्त अवसरमा दिए । यसैबीच, दाहालले १४ वर्षअघि आएको भूकम्पले ध्वस्त बनाएको गुजरातको विकासबाट आफू प्रभावित भएको बताउँदै गुजराती जनताबाट आफ्नो भव्य स्वागत बताए । ‘गुजरातको भुललगायत ५ एकीकृत बस्तीको मैले अवलोकन गरेँ । पाँच दिने औपचारिक भ्रमणबाट स्वदेश फर्किएका प्रचण्डलाई स्वागत गर्न विमानस्थलमा एमाओवादीका नेता तथा कार्यकर्ता पुगेका थिए । कार्यकर्ताले प्रचण्डका स्वागता नारावाजी समेत गरेका थिए ।