सङ्घीयता बिनाको संविधानको कल्पना गर्न सकिदैन्ः प्रधानमन्त्री

जनकपुरधाम । प्रधानमन्त्री सुशील कोइरालाले सङ्घीयता बिनाको संविधानको कल्पना गर्न समेत नसकिने भन्दै संविधानमा सबैलाई समेटेर अगाडि बढने प्रयास भइरहेको बताएका छन् । जनकपुरको राम चोकमा नवनिर्मित राम टावरको आज उद्घाटन गर्दै प्रधानमन्त्री कोइरालाले सीमाङ्कनका बारेमा उठिरहेको विषयमा पनि व्यापक छलफल भइरहेको उल्लेख गरे । मुलुकमा सङ्घीय लोकतान्त्रिक गणतन्त्र र समावेशीता एउटा ठूलो परिवर्तनको उपलब्धि भएको चर्चा गर्दै उनले सबैले मिलेर यो परिवर्तनको रक्षा गर्नु आजको आवश्यकता हो भने । प्रधानमन्त्री कोइरालाले आउँदो संविधानमा कसैको हकअधिकार, वेषभूषा र सांस्कृतिक पहिचान नखोसिने प्रतिबद्धता व्यक्त गरे । उनले संविधानको विरोध गर्ने मधेसवादी मोर्चाका नेताहरुसँग पनि छलफल भइरहेको बताए । प्रधानमन्त्री कोइरालाले दश वर्षभित्र यो मुलुकको कायापलट गर्ने बताउँदै छिमेकी मुलुकलाई दोष दिनुभन्दा हामी एक भएर अगाडि बढ्नुपर्ने बताए । उनले भारत सरकारले नेपाललाई हुलाकी सडक बनाउन सहयोग गरेकाले यो काम चाँडै सुरु हुने बताए । उनले तराईको सामाजिक आर्थिक विकासमा सरकारले विशेष कार्यक्रम ल्याउने उल्लेख गरे । युवाहरु विदेश पलायन भइरहेकोप्रति चिन्ता व्यक्त गर्दै प्रधानमन्त्री कोइरालाले नेपालमा रोजगारीको पर्याप्त सम्भावना रहेको र युवाले विदेशमा पसिना बगाउनुको साटो नेपालमा बगाउँदा झनै उपलब्धिमूलक हुने धारणा राखे । राम युवा कमिटीका अध्यक्ष रामबाबु साहको अध्यक्षतामा भएको सो उद्घाटन समारोहमा राष्ट्रिय योजना आयोगका उपाध्यक्ष डा गोविन्द पोखरेलले जनकपुरलाई धार्मिक र पर्यटकीयस्थलको रुपमा विकास गर्न आयोग कटिबद्ध रहेको बताउ । सो टावर रु ५३ लाखको लागतमा निर्माण भएको अध्यक्ष साहले जानकारी दिए । यसैगरी प्रधानमन्त्री कोइरालाले जनकपुरको प्रसिद्ध जानकी मन्दिर र राम मन्दिरमा पूजापाठसमेत गरे ।