सरकारको नीति तथा कार्यक्रम बहुमतले पारित

काठमाडौँ । व्यवस्थापिका–संसद्बाट आर्थिक वर्ष २०७२/७३ का लागि नेपाल सरकारको नीति तथा कार्यक्रम बहुमतले पारित भएको छ । धन्यवादको प्रस्तावद्वारा राष्ट्रपतिबाट यही असार २३ गतेको बैठकमा पेस भएको सम्बोधनमा उल्लिखित आर्थिक वर्ष २०७२/७३ का लागि नेपाल सरकारको नीति तथा कार्यक्रममाथि प्राप्त संशोधनलाई बैठकले अस्वीकार गर्दै नीति तथा कार्यक्रम पारित गरेको हो । नीति तथा कार्यक्रममा एमाओवादीका गिरिराजमणि पोखरेल, राप्रपा नेपालका सुशीलकुमार श्रेष्ठ, राष्ट्रिय जनमोर्चाका मीना पुन, नेपाल मजदुर किसान पार्टीका अनुराधा थापामगरलगायतले संशोधन प्रस्ताव फिर्ता लिन अस्वीकार गरेका थिए । बैठकमा अर्थमन्त्री डा रामशरण महतले आर्थिक वर्ष २०७१/७२ को आर्थिक सर्वेक्षण पेस गरे । त्यसअघि बैठकमा सभामुख सुवास नेम्वाङले अर्थ मन्त्रालयबाट प्राप्त आर्थिक वर्ष २०७२/७३ को राजस्व र व्ययको अनुमान पेस गर्नेसम्बन्धी पत्रको व्यहोरा वाचन गरेका थिए । व्यवस्थापिका–संसद्को अर्को बैठक यही असार २९ गते मङ्गलबार अपराह्न १६ः०० बजे बस्नेछ । उक्त बैठकमा अर्थमन्त्रीले आर्थिक वर्ष २०७२/७३ को राजस्व र व्ययको विवरण बजेट पेस गर्नेछन् ।