महाकालीले तीन घर बगायो, बिद्यालय ३ दिन बन्द

दार्चुला । विहीबारदेखिको निरन्तरको वर्षाका कारण महाकाली नदीमा पानीको बहाव बढेको छ । निरन्तरको वर्षाले नदीमा पानीको सतह बढेसँगै खलंगाका स्थानीयमा बाढीको त्रास समेत बढेको हो । गएराति महाकाली नदीमा आएको बाढीले जिल्ला सदरमुकाम खलंगाका तीन घर बगाएको छ । अपी नगरपालिका–११ बंङ्गाबगडका गणेश सिह बोहरा, हरक सिह महरा र गजैसिह महराको घर बगेको हो । त्यसैगरी सोही स्थानमा रहेको कैलाशपति निमावि छाङ्गरु र ब्यांस गाविसको भवन लगायत एक दर्जन भवनहरु पुर्णरुपमा जोखिममा रहेका छन । नदीको सतह बढिरहेकाले जोखिम बढेको भन्दै कैलाशपति निमावि तीन दिनका लागि बन्द गरिएको छ । विद्यालय व्यवस्थापन समितिको आज बिहानै आकस्मिक बैठक बसी विद्यालय मंगलबारसम्म बन्द गर्ने गरिएको प्रध्यानाध्यापक राजेन्द्रबहादुर सिंहले बताए । नदीमा पानीको सतह बढेपछि तटबन्ध निर्माण कार्य पूर्ण रुपमा प्रभावित भएको छ । नदीमा पानी बढेसँगै ठेकेदारहरुले आफ्नो निर्माण सामग्रीहरु सुरक्षित स्थानमा सारेका छन । महाकाली नदीको जलस्तर खतराको चिन्हसम्म पुगेकोले बिहिबार साँझदेखि नै उच्च सर्तकता अपनाइएको प्रमुख जिल्ला अधिकारी प्रेमसिंह कुँवरले बताए । सबै सुरक्षा निकाय तथा तटबन्ध निर्माण गर्ने ठेकेदार कम्पनीहरुलाई समेत तयारी अवस्थामा रहेन निर्देशन दिएको उनको भनाई छ ।