आज दाता सम्मेलन, सात मन्त्रीसहित दुई सय ८० अतिथि

काठमाडौं । भुकम्पपछिको पुर्ननिर्माणका लागि सहयोग जुटाउनका लागि सरकारले आज आयोजना गरेको अन्तराष्ट्रिय दाता सम्मेलन हुँदैछ । दाता सम्मेलनको प्रधानमन्त्री सुशील कोइरालाले बिहान १० वजे सोल्टी होटलमा उदघाटन गर्ने कार्यक्रम रहेको छ । अन्तर्राष्ट्रिय दाता सम्मेलनमा विभिन्न ६ देशबाट मन्त्रीस्तरीय र एक देशबाट राज्यमन्त्रीको सहभागिता भएको छ । बुधबारसम्म विभिन्न देशबाट दुई सय ८० प्रतिनिधि सम्मेलनमा भाग लिन काठमाडौं आइपुगेका छन् । चीनका परराष्ट्रमन्त्री वाङ यी, भारतकी विदेशमन्त्री सुषमा स्वराज बुधबार काठमाडौं आएका छन् । वाङ हिजो दिउँसो र स्वराज हिजो साँझ आइपुगेकी हुन् । नर्वेका विदेशमन्त्री बोर्गे ब्रेन्डी र बंगलादेशका अर्थमन्त्री अब्दुल मल अब्दुल मुथ, जापानका विदेश राज्यमन्त्री हिनोरो किउची पनि बुधबार नै आइपुगेका छन् । श्रीलंका र भुटानका मन्त्री भने मंगलबार काठमाडौं आइसकेका थिए । युरोपियन युनियनका विकास मामिला कमिसनर, जाइकाका अध्यक्ष, विश्व बैंकका उपाध्यक्ष पनि सम्मेलनमा सहभागी हुँदै छन् । चीन, भारत, बंगलादेश, नर्वे र जापानका मन्त्रीले बुधबार नै प्रधानमन्त्री सुशील कोइरालासँग शिष्टाचार भेट गरेका छन् । काठमाडौं आइपुगेका दातृ समुदायका प्रतिनिधिलाई भूकम्पबाट प्रभावित उपत्यकाका पर्यटकीय क्षेत्रको अवलोकन गराइएको छ । सरकारले सम्मेलनका लागि विभिन्न देश, संघसंस्था र व्यक्ति गरी ७० जनालाई निमन्त्रणा पठाएको थियो । तीमध्ये ५५ ठाउँबाट सहभागिता हुने पक्का भएको छ ।