पाँचवटै उपसमितिका प्रतिवेदन कार्यदलमा पठाउने निर्णय

काठमाडौं । संविधान मस्यौदा समितिको आजको बैठकले पाँचवटै उपसमितिका प्रतिवेदन संविधानको एकीकृत मस्यौदाका लागि संविधान मस्यौदा एकीकृत कार्यदलमा पठाउने निर्णय गरेको छ । उक्त कार्यदलमा समितिका सभापति कृष्णप्रसाद सिटौला सदस्यहरु भरत मोहन अधिकारी, रमेश लेखक, जीतेन्द्रनारायण देव र अइन्द्रसुन्दर नेम्वाङ रहेका छन् । संविधान मस्यौदा समितिले प्रमुख चार दलबीच भएको १६ बुँदे सहमति अनुरूप मस्यौदा प्रतिवेदन पेश गर्न ती उपसमितिलाई निर्देशन दिएको थियो । उपसमितिका प्रतिवेदनमा केन्द्रित रहेर सभासद्हरुले वैठकमा व्यापक छलफल गरेका थिए । वैठकपछि समितिका सभापति सिटौलाले पाँचवटै उपसमितिले आ–आफनो प्रतिवेदन पेस गरेको तथा प्रतिवेदनमाथिको छलफल आजै टुङ्गिएकाले यही असार ७ गते बस्ने समितिको वैठकमा एकीकृत मस्यौदा निर्माण गरी पेस गर्न उपसमितिको प्रतिवेदन एकीकृत कार्यदलमा पठाउने निर्णय भएको जानकारी दिए । कार्यदलले एकीकृत मस्यौदा तयार गरेपछि समितिमा संविधानको भाग, धारा, उपधारा, प्रस्तावनालगायतका विषयमा विस्तृतरुपमा छलफल हुने उहाँले बताउनुभयो । त्यसपछि प्रारम्भिक मस्यौदा टुङगोमा पुग्ने छ । संवैधानिक–राजनीतिक संवाद तथा सहमति समितिले फरक मतसहित पठाएको १६ बुँदे सहमतिलाई संविधानसभाको पूर्ण बैठकले पारित गर्दै मस्यौदाका लागि समितिमा पठाएको थियो ।