घुम्न आएका पर्यटक भूकम्पपीडितका टहरा बनाउँदै

धादिङ । धादिङको कुम्पुर गाविसको पिप्ले जहाँ सुन्दर बस्ती भग्नावशेषमा परिणत भएको देखेपछि अमेरिकाबाट नेपाल घुम्न आएका पर्यटक भेन्कल ट्रोभेलेङ म्याटले भुकम्प पिडितका लागि टहरा निर्माण अभियानमा जुटे । उनले भुकम्पका कारण परेको विपत्ति देखेपछि सहयोग गर्नका लागि उनी तयार भए । आफूले गर्ने सहयोगले कसैको घरबार राम्रो हुन्छ भने किन नगर्ने भन्ने उनको सोचाइले गर्दा सहयोग गर्न दिनरात खटिएर अस्थाई आवासका लागि टहरा बनाईदिए । म्याटमात्र होइन नेपाल घुम्न आएका अमेरिका, बेलायत, जर्मनी, फ्रान्स, अस्ट्रेलिया, स्विट्जरल्यान्ड, क्यानडालगायतका नागरिक भूकम्पपीडितका लागि टहरा निर्माणको सहयोगमा जुटेका हुन् । स्विट्जरल्यान्डका नागरिक केइच हेन्वचले भने, ‘पर्यटकको रुपमा नेपाल घुम्न आएको भए पनि वैशाख १२ को भूकम्पले नेपालीलाई दुःख दियो । त्यो दुःखमा शारिरिक रुपमा भए पनि सहयोग गर्न पाउँदा धेरै खुसी लागेको छ ।’ मध्य जेठको हपहपी गर्मीमा पसिनाले निथु्रक भिजेको कपडा पनि उनिहरुको ठाउँ–ठाउँमा च्यातिसकेको छ । तर पसिना चुहिरहेका अवस्थामा पनि गर्मीको कुनै परवाह नगरी हातमा गल, घन र किला ठोक्ने औजार लिएर केही विदेशी अनुहार भूकम्पले क्षतिग्रस्त बनाएको पिप्लेमा भत्किएको बस्तीमा अस्थायी टहरा बनाइरहेका छन् । नेपाल घुम्न आएका विभिन्न मुलुकका विदेशी नागरिक मिलेर एक सातामा कुम्पुर गाविसको चेपाङ र घले समुदायको बसोबास रहेको स्याँखुटार, आँपटार, कोदार, कामराङ र पिप्लेमा गरी ४६५ वटाभन्दा बढी अस्थायी आवास बनाइसकेका छन् । विदेशीहरुको मेहनत देखेपछि गाउँलेहरु पनि उनीहरुका साथ लागेर काम गरिरहेका छन् । विदेशी पाहुनाको साथमा स्थानीयहरुसमेत गरी १०० जना सँगै काम गरिरहेका छन् । कुम्पुर गाविसमा रहेका दुई हजार ६२३ घरमध्ये दुई हजार ५८९ घर पूर्णरुपमा क्षति भएको छ भने दुई हजार ५०० शौचालयमध्ये दुई हजार ४०० शौचालयसमेत पूर्णरुपमा क्षति पुगेको कुम्पुर गाविसका पूर्व अध्यक्ष रंग थपलियाले बताए ।