एन्फा कार्यवाहक अध्यक्ष श्रेष्ठको अन्त्येष्टि गरिँदै

काठमाडौँ । करेन्ट लागेर गएराति निधन भएका अखिल नेपाल फुटबल सङ्घ एन्फाका कार्यवाहक अध्यक्ष ललितकृष्ण श्रेष्ठको आजै अन्त्येष्टि गरिने भएको छ । भूकम्पले मङ्गलबजारको पुरानो भत्केपछि शुक्रबार मात्रै भैंसेपाटीस्थित नयाँ घरमा सरेका श्रेष्ठको घरको वाइरिङ मिलाउने क्रममा करेन्ट लागी निधन भएको थियो । एन्फाका कार्यकारी अधिकृत इन्द्रमान तुलाधरका अनुसार करेन्ट लागेलगत्तै परिवारका सदस्यले उपचारका लागि अल्का अस्पताल लगेपछि चिकित्सकले श्रेष्ठलार्इ मृत घोषणा गरेका थिए । श्रेष्ठको पार्थिव शरीरलाई श्रद्धाञ्जलिका लागि बिहान ७ देखि ९ बजेसम्म थ्रीस्टार क्लब मङ्गलबजारमा राखियो । ९ बजेपछि अखिल नेपाल फुटबल सङ्घ (एन्फा) कम्प्लेक्स सातदोबाटोमा राखिएको तुलाधरले बताए । श्रेष्ठको आजै दिउँसो पशुपति आर्यघाटमा दाहसंस्कार गरिनेछ । श्रेष्ठका पत्नी, एक छोरा र एक छोरी छन् । अढाइ दशकभन्दा लामो समयदेखि मुलुकको फुटबल खेलमा समर्पित थ्रीस्टार क्लबका अध्यक्षसमेत रहेका श्रेष्ठको अकल्पनीय निधनले सम्पूर्ण खेल क्षेत्रमा ठूलो क्षति पुगेको बताउँदै तुलाधरले नेपाली फुटबलक्षेत्रले एउटा हस्ती र मिलनसार व्यक्ति गुमाएको प्रतिक्रिया दिए । तीन कार्यकाल थ्रीस्टार क्लबका अध्यक्ष भइसकेका श्रेष्ठको व्यावसायिक फुटबलमा पनि महत्वपूर्ण योगदान थियो ।