एमाओवादी नेतृत्वको मोर्चामा बिभाजन आएपछि २८ दल संगठित हुँदै

काठमाडों । ३० दलीय मोर्चाको असहमतिका बाबजुद एमाओवादी अध्यक्ष पुष्पकमल दाहाल र फोरम लोकतान्त्रिकका अध्यक्ष विजय गच्छदारले कांग्रेस–एमालेसँग सम्झौता गरेको भन्दै विपक्षी २८ दलले आगामी रणनीति तय गर्नका लागि छलफलमा जुट्ने भएका छन् । एमाओवादी नेतृत्वको मोर्चामा रहेका एमाओवादी र फोरम लोकतान्त्रिक बाहेक २८ दलको बैठक मंगलबार सिंहदरबारमा बोलाइएको छ । बैठकले आगामी रणनीति तयार गर्ने सद्भावना पार्टीका सहअध्यक्ष लक्ष्मणलाल कर्णले बताए । ‘बीचमा असमझदारी बनेपछि मोर्चाबाट निर्णय गरेर बैठकमा प्रतिनिधि पठाउने कुरा भएको थियो । सोमबारको बैठकमा मोर्चाको तर्फबाट प्रतिनिधि गएका छैनन’ कर्णले भने ‘प्रचण्डले एमाओवादीका अध्यक्षको हैसियतमा र गच्छदारले फोरम लोकतान्त्रिकका अध्यक्षको हैसियतमा सहमतिपत्रमा हस्ताक्षर गरेका हुन । त्यो हामीहरुलाई मान्य छैन । त्यस्तो सहमति हामी अस्वीकार गर्छौ ।’तराई मधेस लोकतान्त्रिक पार्टीको संसदीय दलको कार्यालय सिंहरदबारमा बिहान ११ बजेपछि बस्ने २८ दलको बैठकमा २८ दलीय मोर्चा बनाउने विषयमा छलफल हुने नेताहरुले बताएका छन । उच्च स्रोतका अनुसार अब २८ दलीय मोर्चाको नेतृत्व तराई मधेस लोकतान्त्रिक पार्टीका अध्यक्ष महन्थ ठाकूरले गर्नेछन ।