आजदेखि विद्यालय सञ्चालन, पठनपाठनमा समस्या

काठमाडौं । सरकारको आजदेखि विद्यालय सञ्चालन गर्ने भन्ने निर्देशनअनुरूप शिक्षक र व्यवस्थापन समितिहरू तयारीमा जुटेका छन् । तर, भूकम्पबाट भौतिक संरचना ध्वस्त भएका धेरैजसो विद्यालयमा अझै अस्थायी कक्षाकोठाको व्यवस्था हुन नसक्दा पठनपाठन सुरु भइहाल्ने अवस्था छैन । सामुदायिक विद्यालयहरूले अस्थायी कक्षाकोठा बनाउने तयारी गर्दैछन् । संस्थागत विद्यालय ध्वस्त भवनको विकल्पको खोजी तथा मर्मत सम्भारमा जुटेका छन् । तत्काल विद्यालय खोल्न विभिन्न दातृ निकायले जिल्ला शिक्षा कार्यालयको समन्वयमा अस्थायी टहरा बनाउन सघाइरहेका छन् । तर कामले तीव्रता पाएको छैन । अस्थायी कक्षाकोठा निर्माण तीव्र पार्न पर्याप्त सामग्री र जनशक्ति अभाव छ । भूकम्पको त्रास हटाउन सबै शिक्षकलाई मनोसामाजिक परामर्श दिइएको जिल्ला अधिकारीहरूले जनाएका छन् । नयाँ शैक्षिक सत्र सुरु भएलगत्तै आएको प्राकृतिक विपत्तिपछि उपत्यकाबाट बाहिरिएका विद्यार्थी र अभिभावक अझै फर्केका छैनन् ।