सरकारद्धारा त्रिपाल खरिदका लागि सार्वजानिक आह्वान

काठमाडौ । सहरी बिकास मन्त्रालयले भूकम्प प्रभावित क्षेत्रमा त्रिपाल अपुग भएपछि खरिदका लागि विना टेण्डर प्रस्ताव माग गरेको छ । सार्वजनिक खरिद ऐन अनुसार राष्ट्रिय विपतका बेला बिना टेण्डर सामान खरिद गर्ने छुट सरकारलाई छ । पीडित परिवारलाई तत्काल राहतका लागि उपलब्ध गराउन विभिन्न साइजका त्रिपाल आवश्यक परेकाले उत्पादक वा विक्रेताहरुलाई प्रस्ताव पेश गर्न सहरी विकास मन्त्रालयले गोरखापत्र सार्वजनिक सूचना जारी गरेको छ । मन्त्रालयले जारी गरेको सुचनामा भनिएको छ–‘ बिभिन्न साइजका तारपोलिन त्रिपाल आवश्यक परेकोले इच्छुक उत्पादक बिक्रेताहरुले अफुसंग भएको मौजदात आपुर्ति गर्न सक्ने परिणाम, नमुना र दररेट समेत खुलाई बैशाख २२ गते ५ वजेभित्र पेश गर्नु हुन सार्वजानिक आह्वान गरिन्छ ।’ मन्त्रिपरिषदले त्रिपाल खरिद गर्ने जिम्मा सहरी विकास मन्त्रालयलाई दिएपछि सहरी बिकास मन्त्रालयले त्रिपाल खरिदका लागि प्रक्रिया अगाडि बढाएको हो । यसैवीच भूकम्प पीडितहरुका लागि अत्यावश्यक भएको त्रिपाल खरिदमा सरकारले भन्सार छुट दिएको छ । सरकारले पीडितहरुको राहतमा सहयोग पुगोस् भनेर त्रिपाल एवम् पालहरुको आयातमा लाग्ने सम्पूर्ण भन्सार तथा करहरु वैशाख १९ देखि जेठ २० गतेसम्मका लागि छुट गरेको छ ।