एक्सपर्ट फाउन्डेसनद्वारा भूकम्प पिडितलाई राहत वितरण

सिड्नी । शैक्षिक क्षेत्रमा परामर्स सेवा पुर्याउँदै आएको एक्सपर्ट एजुकेसन एण्ड भिषा सर्भिसेजले हालै एक्सपर्ट फाउन्डेसन मार्फत नेपालको नुवाकोट जिल्लाको बागेश्वरी र फलाटे गाविसका भूकम्प पिडित करिब २ सय घरपरिवारहरुलाई राहत सामग्री वितरण गरेको छ । अस्ट्रेलियामा विधिवत रुपमा दर्ता भएर नेपालको शिक्षा, स्वास्थ्य क्षेत्रका बालवालिकाहरुमा सहयोग गर्ने हेतुले फाउन्डेसनले च्यारिटीको कार्यक्रम अगाडि बढाएको हो । नेपालमा पिडितहरुले समयमा नै राहत तथा उद्वार नपाएको अर्यालले नेपाल न्युज अस्ट्रेलियालाई बताए । उनले भने –राहतका सामग्री सम्बन्धित ठाउँमा पुगेपनि दलगत रुपमा कुरा नमिल्दा ढिलाई भएको छ । नुवाकोटका दुर्गम गाउँमा राहत सामग्री लिएर पुगेका अर्यालले पिडितहरुको अवस्था निकै दर्दनाक रहेको बताए । उनले भने– “सयांै घरहरु पूर्ण रुपमा भत्किएका छन् । त्रिपालको अभावको कारण खुल्ला आकासमुनि कष्टकर रुपमा रात विताइरहेको छन् ।” प्रारम्भमा अस्ट्रेलिया रहेका एक्सपर्ट शाखाहरुबाट जम्मा गरिएको १० हजार अस्ट्रेलियन डलरबाट भूकम्प पिडितहरुलाई राहत वितरण गरिएको उनले जानकारी दिए । सो फाउन्डेसनले पहिलो चरणको राहत वितरण अन्र्तगत टेन्ट, म्याट, ब्ल्याकेट, टर्च लाइट, चाउचाउ, बिस्कुट, चिउरा, साबुन, टुथ पेस्ट, भाडाकुडा लगायत फस्ट एडका सामग्रीहरु वितरण गरेको थियो । दोस्रो चरणको राहत वितरण कार्यक्रमका लागि फाउन्डेसनका सदस्यहरुको मिटिङबाट छिट्टै अर्को कार्यक्रम तय गर्ने अर्यालले जानकारी दिए । सो फाउन्डेसनमा एक्सपोर्ट एजुकेसन एण्ड भिषा सर्भिसेजका डाईरेक्टरद्वय संजीव शर्मा, बद्री अर्याल, मेलवर्न शाखाका सरोज शर्मा, ब्रिसवेन शाखाका सागर अर्याल तथा एडिलेट शाखाका रुपक बर्तौला लगायत एक्सपर्ट एजुकेसन टिमका अस्ट्रेलिया र नेपाल गरि करिब ७० जना स्टाफहरुले यसमा हातेमालो गर्दै अगाडि बढेका छन् । । सो फाउन्डेसनले नेपालमा भूकम्पले ध्वस्त बनाएको कुनै एक विद्यालयको भवन निर्माण गरिदिने फाउन्डेसनका संजीव शर्माले नेपाल न्युज अस्ट्रेलियालाई बताए । यस अघि पनि एक्सपोर्ट एजुकेसनले व्यक्तिगत तवरबाट नेपालमा करिब ३० भन्दा बढी बालवालिकाहरुलाई निःशुल्क शिक्षा प्रदान गर्दै आएको छ । समाजसेवाको कामलाई अझ बढी प्रभावकारी तथा व्यवस्थित गराउनको लागि एक्सपर्ट फाउन्डेसन मार्फत जान लागेको शर्माले बताए ।