काठमाडौंका सडक समयमा नबनाउने ठेकेदारलाई कालोसूचीमा राख्न निर्देशन

काठमाडौं । काठमाडौं उपत्यकाका सडक बिस्तार र मर्मतको ठेक्का लिएर पनि तोकिएको समयमा काम सम्पन्न नगर्ने ठेकेदारलाई कालो सूचीमा राखेर आइन्दा ठेक्का नपाउने गरी कारवाही गर्न संसदको विकास समितिले सरकारलाई निर्देशन दिएको छ । बर्खा लागिसक्दा पनि काठमाडौंका भत्किएका सडक निर्माण नभएको र पानी पर्नासाथ आहालमा परिणत हुन थालेपछि समितिले काममा ढिला गर्ने ठेकेदारलाई आइन्दा ठेक्का पाउनै अयोग्य घोषित गर्न निर्देशन दिएको हो । समितिको निर्णय सुनाउँदै सभापति रविन्द्र अधिकारीले ‘तोकिएको समयावधिभित्र सडक निर्माण सम्पन्न नगर्ने निर्माण व्यवसायीहरुलाई कालो सूचीमा राख्ने तथा भविष्यमा ठेक्का प्राप्त गर्न नसक्ने गरी कार्वाही गर्ने व्यवस्था गर्न र समयमा नै राम्रो कार्य सम्पन्न गर्ने ठेकेदारलाई पुरस्कृत गर्ने व्यवस्था समेत गर्न निर्देशन दिइएको बताए । समितिले ठेकेदारलाई कारवाही र पुरस्कारको मापदण्ड बनाउन समेत सरकारलाई निर्देशन दिएको छ । समितिले उपत्यकाको सडक सन्जाल सहितको काठमाडौं उपत्यका विकास गुरुयोजना अनुसार सडक बिस्तार निर्माण कार्यलाई आबद्ध गर्न समेत निर्देशन दिएको छ । समितिको सोमवारको बैठकमा सम्बद्ध मन्त्रालयका मन्त्री र आयोजना प्रमुखहरुसँग छलफलपछि समितिले सडक बिस्तार तथा निर्माणका कामलाई व्यवस्थित बनाउन बिभिन्न निर्देशन दिएको हो । समितिले उपत्यकाका सडक बिस्तार गर्दा कुनै पनि क्षेत्रका सडक बिस्तार वा मर्मतको काम गर्दा सबै निकायसँग समन्वय गरी एकैपटकमा सबै काम गर्न निर्देशन दिएको छ । यसैबीच समितिले बैशाख १३ देखि१६ गतेसम्म नेपालका पूर्वी तराइदेखि रुपन्देहीसम्मका जिल्लाहरुमा हुलाकी राजमार्गको कार्यान्वयनको स्थिति अवलोकन गर्न सभापति अधिकारीकै नेतृत्वमा सभासदहरु स्थगलगत भ्रमण गर्ने निर्णय समेत गरेको छ ।