बुटवल औद्योगिक क्षेत्रमा लोडसेडिङले समस्या

बुटवल । बुटवल औद्योगिक क्षेत्रमा अनियमित र लामो लोडसेडिङ भएको भन्दै उद्योगीले लोडसेडिङ घटाउन माग गरेका छन् । आवासीय क्षेत्रमा भन्दा बढी लोडसेडिङ भएको भन्दै उद्योगीले औद्योगिक क्षेत्रमा भइरहेको अनियमित लोडसेडिङले उत्पादनमा कम भएको पनि गुनासो गरेका छन् । सम्बन्धित निकाय र कार्यालयमा पटकपटक आग्रह गर्दा पनि उद्योगीहरुका मागमा सुनुवाइ नभएको भन्दै उनीहरुले अब पनि मागको सुनुवाइ नभए चरणबद्ध आन्दोलनमा उत्रिने चेतावनी दिएका छन् । बुटवल औद्योगिक क्षेत्र उद्योग संघले औद्योगिक क्षेत्रको लोडसेडिङ १२ घण्टाबाट घटाएर आठघण्टा कायम गर्न र नभए सातामा तीन दिन पूरै काटेर चार दिन बिजुली उपलब्ध गराउन पनि प्रस्ताव गरेका छन् । औद्योगिक क्षेत्रमा साँझ ६ बजेदेखि रातभर विद्युत कटौती हुँदा असुरक्षा र चोरीका घटनासमेत बढेको गुनासो गर्दै औद्योगिक क्षेत्र उद्योग संका अध्यक्ष रामप्रसाद बस्यालले बत्ती बाल्नकै लागि भएपनि विद्युत् आपूतिको व्यवस्था गर्न माग गरिएपनि सुनुवाइ नभएको गुनासो गरे । औद्योगिक क्षेत्रमा दैनिक १२ घण्टाभन्दा बढी लोडसेडिङ हँुदा उद्योग सञ्चालनमा कठिनाइ उत्पन्न भएको अध्यक्ष बस्यालले बताए । औद्योगिक क्षेत्र उद्योग महासंघका अध्यक्ष तिलप्रसाद भट्टराईले औद्योगिक क्षेत्र लोडसेडिङमुक्त बनाउनुपर्नेमा आवासीय क्षेत्रमा भन्दा बढी लोडसेडिङ हुनु विडम्बना भएका बताए । नेपाल उद्योग परिसंघका केन्द्रीय सदस्य एजाज आलमले औद्योगिक क्षेत्रमा अनियमित लोडसेडिङ हँुदा उत्पादन ठप्प भएको बताए ।