राधेश पन्तको घर घेर्ने विप्लव माओवादीका २ दर्जन नेता कार्यकर्ता पक्राउ

काठकाडौं । नेत्रविक्रम चन्द नेतृत्वको नेकपा माओवादीका पोलिटब्यूरो सदस्य ईश्वरी दाहाल र अर्का पोलिटब्यूरो सदस्य पदम राईलाई प्रहरीले गिरफ््तार गरेको छ । उनीलाई शुक्रबार दिउसो महाराजगञ्जबाट गिरफ्तार गरिएको हो । उनीहरुलाई अहिले जिल्ला प्रहरी कार्यालय हनुमानढोकामा लगिएको छ । विभिन्न आयोजनाहरुमा राष्ट्रघाती सम्झौता गर्न मुख्य भूमिका खेलेको भन्दै त्यसको विरोध स्वरुप नेपाल लगानी वोर्डका कार्यकारी निर्देशक राधेश पन्तको महाराजगञ्ज स्थित घर घेराउ कार्यक्रमबाट उनलाई गिरफ्तार गरिएको हो । प्रहरीले माओवादीको मजदुर संगठनका नेता प्रेम दर्नाल सहित अन्य १७ जना कार्यकर्तालाई पनि गिरफ्तार गरेको छ । भ्रष्टाचार, कमिसनखोरी, दलाली, महंगी तथा कालोबजारीका विरुद्ध निरन्तर संघर्ष गर्दै आइरहेको नेकपा माओवादीले आज पन्तको घरमा कालोझण्डा गाड्ने र विरोध प्रदर्शन गर्ने कार्यक्रम राखेको थियो । सोही कार्यक्रममा गएका माओवादीका पोलिटब्यूरो सदस्य तथा नेवा राज्य इन्चार्ज दाहाल लगायतलाई प्रहरीले गिरफ्तार गरेको हो । पन्तको घर घेराउ गर्ने क्रममा केहीबेर प्रहरी र आन्दोलनकारीबीच झडप पनि भएको थियो । करिव ५ सय कार्यकर्ताहरुले नारावाजी गर्दै पन्तको घरको कम्पाउण्ड घेरेका थिए । उनीहरुले राष्ट्रघाती सम्झौतामा भूमिका नखेल्न र त्यसको शिकार नहुन पनि आग्रह गरेका थिए ।