एसिड आक्रमणकारी जीवन बिकलाई प्रहरीद्धारा सार्वजानिक,पत्रकार सम्मेलनमा बिक बेहोस

काठमाडौं । बसन्तपुरमा ट्युसन पढिरहेकी किशोरी संगीता मगर र सीमा बस्नेतमाथि एसिड आक्रमण गर्ने युवकलाई प्रहरीले शुक्रबार सार्वजनिक गरेको छ । महानगरीय आयुक्तको कार्यालय रानीपोखरीमा अहिले पत्रकार सम्मेलन गरि जीवन बिकलाई सार्वजनिक गरेको हो । महानगरीय अपराध अनुसन्धान महाशाखा हनुमानढोकामा कार्यरत एसपी मीरा चौधरीको नेतृत्वको टोलीले टोखाबाट नियन्त्रणमा लिएको हो । मिराको नेतृत्वमा रहेको डिएसपी रमेश थापा,शिशु शर्मा, दिनेश आचार्य वेद विष्ट, प्रहरी निरीक्षक पूर्णिमा चन्द र निरज भट्टको टिमले पक्राउ गरेको हो । प्रहरीले धेरै दिनको अनुसन्धान र खोजीपछि अन्ततः संगीताका परिवारजन डेरा गरी बस्ने घरमै डेरा लिएर बसेका युवकलाई समातेको हो । मगर परिवारले बिकमाथि शंका गर्दै आएको थियो । एसिड आक्रमणकारी बिक पत्रकार सम्मेलनमै बेहोस भएका छन् । महानगरीय प्रहरी प्रभाग रानीपोखरीमा आयोजित पत्रकार सम्मेलन उनी बेहोस् भएका हुन् । उनलाई उपचारका लागि अस्पताल पुर्याएको छ । बिहीबार पक्राउ परेका उनलाई प्रहरीले आज सार्वजनिक गरेको हो । उनीबारे प्रहरीले जानकारी दिइरहेका बेला उनी एक्कसी बेहोस् भएका हुन्। रामेछाप फुलासी–८ निवासी जीवन विकले संगीता पुलामी मगर, सीमा बस्नेत र हेमु मुखर्जीलाई एसिड हानेको स्विकारेका छन् । महानगरीय प्रहरी प्रभागमा शुक्रबार पत्रकार सम्मेलनमा उनले भारतीय टेलिभिजनबाट प्रभावित भएर केटीको रुप बिगार्न एसिड हानेको स्विकारे । बिक बीबीएस पहिलो वर्षमा अध्ययनरत हुन् । विक यसअघि संगीता बस्ने घरमै डेरा लिएर बस्थे। त्यतिबेला उनले संगीतालाई पढ्नसमेत सिकाउँथे। पछि घरमा झगडा गरेर उनी भारतीय आर्मीका लागि भारत गएका थिए । भारतीय आर्मीमा छनौट नभएपछि उनले भारतीय टेलिभिजनबाटै प्रभावित भएर एसिड हानेको प्रहरीसमक्ष स्विकार गरेका हुन् । उनी टोखामा बस्दै आए पनि आफन्त सबैलाई भारतमै भएको बताउँदै आएका थिए । संगीता र उनका भाइलाई एसिड आक्रमण गर्न उनले असोजमै एसिड खरिद गरेका थिए । त्यही बेला एसिड हान्ने तयारी गरेपनि उनले गत फागुण १० गतेमात्र सो योजना सफल बनाएका थिए ।