फेन्काको १० औं वार्षिकोत्सव सम्पन्न 

सिड्नी ।  अष्ट्रेलियाको नेपाली समुदायहरुको बृहत संस्थागत प्रतिनिधित्व, आपसी समन्वय र सशक्तिकरण गर्ने उद्देश्य राखेर अप्रिल ९, २०१५ मा गठन भएको नेपाली सामुदायिक संस्थाहरुको महासंघ फेन्का (FeNCAA) ले आफ्नो १० औं वार्षिकोत्सव यहि अप्रिल ९ तारिख सम्पन्न भएको छ ।

भर्चुअल माध्यमबाट सम्पन्न भएको सो वार्षिकोत्सव कार्यक्रममा अष्ट्रेलियाका लागि नेपालका राजदुत चित्रलेखा यादवले छोटो समयमा अस्ट्रेलियाको संघिय सरकारसंग गरेको समन्वय र सहकार्यको प्रसंशा गर्दै नेपाली संघ सस्थाहरुलाई जोडेर  अष्ट्रेलियामा रहेका नेपालीहरुको लागि शिक्षा, स्वास्थ्य, नेपाली भाषा, कला र संस्कृतिको पहिचान र जगेर्नामा गर्दै आएको कार्यहरुको निरन्तरतामा जोड दिन र प्रभावकारी भूमिका खेल्न आग्रह गरिन । सो अवसरमा उनले फेन्काको कार्यविवरणहरुको आधिकारिक जानकारी गराउने उद्देश्यले प्रकाशित न्यूजलेटरको लोकार्पण गरेकी थिईन ।
साउथ अष्ट्रेलियाका लागि नेपाली कन्सुलर दिपक धमलाले फेन्काले नेपाली समुदायको लागि गर्दै आएको गरेका कार्यको  प्रसंसा गर्दै नेपाली कन्सुलेट अफिससंग समन्वय गरेर फेन्कासंग मिलेर काम गर्न आफू अग्रसर रहेको बताए ।

 
सो अवसरमा नेपाली समुदायका अग्रज, सामाजिक अभियन्ता एवं परिकल्पनाकारहरु डा नारायण प्रधान, ईन्द्रा वन, डा राजु अधिकारी, डा कृष्ण हमाल, बिष्णु हमाल, आङ्दावा शेर्पा र एनआरएनए अष्ट्रेलियाका अध्यक्ष अनिल पोख्रेल लगायतका बक्ताहरुले फेन्काको योगदानलाई स्मरण गर्दै आगामी वर्षहरूमा फेन्काले नेपाली संघसं स्थाहरुको निरन्तर सहकार्यलाई प्रोत्साहित गर्नु पर्नेमा जोड दिए ।
 
 संस्थाका अध्यक्ष बोम योञ्जनको सभापतित्वमा सम्पन्न भएको सो कार्यक्रमको संचालन संस्थाका महासचिव कपिल पाण्डेले गरेका थिए भने  सचिव डा प्रकाश पौडेलले धन्यबाद ज्ञापन गरेका थिए ।  संस्थाका प्रबक्ता भोला गिरिले प्रेस सम्प्रेसण गरेका थिए।

 अष्ट्रेलियाको राजधानी क्यानबेरामा रजिस्टर भएको फेन्का एक गैरराजनीतिक, गैर-भेदभावपूर्ण, गैर-नाफामुखी र गैर-धार्मिक स्वैच्छिक सामुदायिक संस्था हो जुन नेपाली समुदायको कल्याण र कल्याणकारी कार्यहरुमा समर्पित रहदै आएको छ । फेन्कामा हालसम्म अष्ट्रेलियाका सबै राज्य र क्षेत्रहरूका ९५ नेपाली संस्थाहरूको प्रतिनिधित्व रहेको छ ।
  यो कार्यक्रममा फेन्काका अध्यक्ष बोम योञ्जनले संस्थाको १० बर्षे यात्राको उपलब्धिहरुको विवरण पेश गर्नुका साथै सो को समिक्षा एवं विवेचना समेत गरेका थिए । उनले आगामी वर्षहरुमा फेन्काले समुदायको लागि थप कार्यक्रमहरु अझ प्रभावकारी रुपमा एकताबद्ध र संस्ठागत गर्दै जाने बारे प्रतिबद्धता समेत प्रकट गरे । कार्यक्रममा फेन्काको १० बर्षे यात्राको उपलब्धिहरुको श्रब्यदृश्य प्रस्तुत समेत गरिएको थियो ।