श्रीलंकाविरुद्धको दोस्रो एक दिवसीय क्रिकेटमा भारत पराजित

श्रीलंकामा जारी दोस्रो एक दिवसीय क्रिकेटमा आयोजक श्रीलंकाले भारतलाई ३२ रनले हराएको छ । एक दिवसीय क्रिकेटमा तीन वर्षपछि श्रीलंकाले भारतलाई हराएको हो । यससँगै सिरिजमा अहिले श्रीलंकाले अग्रता बनाएको छ ।

टस जितेर पहिले ब्याटिङ रोजेको श्रीलंकाले कोलम्बोमा नौ विकेटको क्षतिमा दुई सय ४० रन बनाएको थियो । तर उसले राम्रो ओपनिङ भने गर्न सकेन । ओपनर पाथुम निसान्का शून्यमै आउट भए । यद्यपि अभिषेक फर्नान्डोले ४०, कुशल मेन्डिसले ३० तथा मामिन्दु मेन्डिसले ४० रन बनाएका थिए ।

भारतका लागि वासिङ्टन सुन्दरले तीन विकेट लिए भने कुलदीप यादवले दुई विकेट आफ्नो नाममा गरे । जवाफमा भारतले उत्कृष्ट सुरुआत गरे पनि लक्ष्य पूरा गर्न सकेन । उसले ४२ ओभर दुई बलमा सबै विकेट गुमाएर दुई सय ८ रन मात्र बनाउन सक्यो । ओपनिङ जोडी रोहित शर्मा र सुभ्मन गिलले ९७ रनको साझेदारी गरे । ४४ बलमा ६४ रन बनाएर रोहित शर्मा आउट भए । सुभ्मनले पनि ३५ रनको योगदान गरे । विराट कोहलीले भने १४ रन मात्र बनाउन सके ।

त्यसपछि लगातार शिवम् दुवे, श्रेयस अयर, केएल राहुल र मोहम्मद सिरज आउट भए । पाँचौ बलरका रुपमा मैदान आएका जेफरी वन्देरसेले ६ विकेट लिएपछि भारत धरापमा परेको हो । उनका अलावा चरिथा असलंकाले पनि तीन विकेट लिए । सिरिजको पहिलो खेल टाइ भएको थियो । सिरिजको अन्तिम खेल बुधबार हुनेछ ।